Аиԥылара мҩаԥысит Урыстәылатәи ацҳаражәҳәарҭаҿы ҳәа аанацҳаит Аԥсны адәныҟатәи аусқәа рминистрра апресс-маҵзура. Аганқәа алацәажәеит аԥсуа-аурыс усеицура аҭагылазаашьеи ԥхьаҟатәи аҿиареи, иара убас ҩ-ганктәи аинырра апрактикатә зҵаарақәа.
Хазы ахшыҩзышьҭра аҭан Аԥсны атәылауаа Урыстәылатәи атәылауаҩра роура азҵаара. Барцыц Гладков иҭабуп ҳәа иеиҳәеит Урыстәылатәи аган иахәҭоу апроцедурақәа рырццакраҿы иахьацхрааз азы.
Аиԥылара иара убас рхы аладырхәит Аԥсны адәныҟатәи аусқәа рминистрра астратегиатә усеицура адепартамент аиҳабы Џьемал Бганба, Урыстәыла ацҳаражәҳәарҭа абжьгаҩ-ацҳаражәҳәаҩ Максим Литвинов, адипмиссиа актәи амаӡаныҟәгаҩ Алексеи Желыгин.
