Ашәҟәы ианылеит Игор Ушаков, Владимир Фиодоров, Дмитри Мизгулин, Сергеи Соловиов уҳәа авторцәа рырҿиамҭақәа реиҭагақәа. Асахьа ҭихит Р.Габлиа.
Аҭыжьымҭа аредактор, Аԥсны аҳәынҭқарра ашәҟәыҩҩцәа Реидгыла ахантәаҩы Вахтанг Аԥҳазоу иазгәеиҭеит ашәҟәы аҭыҵра Урыстәылатәи иколлегацәа аус рыцура ишалҵшәахаз акрызҵазкуа хҭысны ишыҟалаз.
Иара игәалаиршәеит 2024 шықәсазы Иури Коноплианников напхгара зиҭо ашәҟәыҩҩцәа реидгылақәа Жәларбжьаратәи реилазаара ишҭнажьыз 29-ҩык аԥсуа шәҟәыҩҩцәа рырҿиамҭақәа реизга «Аԥсуа жәабжьқәа».
«Фазиль Искандер ихьӡ зху жәларбжьаратәи апремиа иалауреатцәахеит: 2019 шықәсазы – Владимир Делба, 2020 шықәсазы – Витали Шариа, 2021 шықәсазы – Даур Наҷҟьебиа, 2022 шықәсазы Анатоли Лагәлаа аҳаҭыртә диплом иоуит», – иҳәеит Аԥҳазоу, Аԥсны ашәҟәыҩҩцәа реилазаара иҟанаҵаз адгыларазы ҭабуп ҳәа реиҳәеит ПЕН-центр Урыстәылатәи аҟәша анапхгара.
