«Ҭабуп ҳәа шәасҳәарц сҭахуп ианыуадаҩӡаз аамҭазы – Аҧсны жәлар Рџьынџьтәылатә еибашьра анымҩаҧысуаз ҳҳәынҭқарра иашәҭаз ацхырааразы. Зегь рыла ҳажәлар шәрыдгылон. Убри ҳныруеит иахьауажәраанӡагьы. Шәылшамҭақәа ҳасаб рзуны, Аҧсны Ахада Аусҧҟа инапы аҵаиҩит иреиҳаӡоу аҳәынҭқарратә ҳамҭа – «Ахьӡ-Аҧша» аорден шәанашьаразы. Исҭахуп еиҭах ҭабуп ҳәа шәасҳәарц Аҧсни Ҟарачы-Черқьестәылеи рыжәларқәа риашьаратә еизыҟазаашьақәа рырҿиараҿы шәлагаламҭазы, агәра ганы сыҟоуп ҳаиашьаратә еизыҟазаашьақәа шыҕәҕәахауа, ишҿиауа. Ишәыдысныҳәалоит аҳамҭа», – иҳәеит Бадра Гәынба. Абу-Иусуф Банов аҳәынҭқарра анапхгара ҭабуп ҳәа реиҳәеит иусура ахә ҳаракны иахьыршьаз азы.
Аҧсны Ахада ихаҭыҧуаҩ Бадра Гәынба Ҟарачы-Черқьестәыла Абыргцәа Рхеилак ахантәаҩы Абу-Иусуф Банов инапаҿы ииркит Аҧсны иреиҳаӡоу аҳәынҭқарратә ҳамҭа – «Ахьӡ-Аҧша» аорден ахҧатәи аҩаӡара. Аҧсны Ахада Аслан Бжьаниа Иусҧҟала 1992-1993 шықәсқәа рзы Аҧсны жәлар Рџьынџьтәылатә еибашьраан илшамҭақәа рзы, Аҧсни Ҟарачы-Черқьестәылеи реиҩызаратә еизыҟазаашьақәа рырҕәҕәараҿы илагаламҭазы, активла имҩаҧигауа аусуразы Абу-Иусуф Банов 2022 шықәса маи 3 азы ианашьан «Ахьӡ-Аҧша» аорден ахҧатәи аҩаӡара.