Мшаԥымза 7, Аԥсныпресс. Тҟәарчал ахаҿра арԥшӡара иазку аусурақәа мҩаԥысуеит. Аргыларатә еилазаара анапхгаҩы Рауль Шамугиа Аԥсныпресс акорреспондент диҿцәажәо, Тҟәарчал ақалақь имҩаԥысуа аусурақәа ртәы еиҭеиҳәеит. «Аалӡга аӡиас ихыу ацҳа аҩганк рыла – асветофор аҟынтәи еиԥгалоу амҩанӡа ахаҳәцәы ала иаҳчаԥоит. Иара убас, Тҟәарчал апарк хада аҭеиҭыԥш рҽеин. Апарктә мҩахәасҭақәа хаҳәцәыла иаҳчаԥеит, ахәыҷтәы хәмарырҭеи аԥқьаҭмпыл асырҭеи ҳаргылеит, иара убас арлашага ҿыцқәа шьақәҳаргылеит», – ҳәа иазгәеиҭеит иара.
Рауль Шамугиа иажәақәа рыла, иара убас аџьармыкьеи егьырҭ аобиектқәа жәпаки реиҭашьақәыргылара мҩаԥысуеит. «Иазԥхьагәаҭаны иҳамоуп х-ҩнык рхыбрақәа рыԥсахра, аӡыршә аргылара, Тҟәарчал ақалақь ахадара ахыбра аԥхьа хаҳәцәыла ичаԥахоит», – ҳәа иҳәеит уи. Рауль Шамугиа аусурақәа зегьы ақалақь ахарџь ала имҩаԥгахоит ҳәа инаҵшьны иазгәеиҭеит.