Аиԥылараҿы ирылацәажәеит «Арҵаҩцәа рыҭҵаарадырратә центр аусура методикала аиқәыршәара» апроект инҭагӡаны, Нхыҵ-Кавказтәи Афедералтә университет аспециалистцәа имҩаԥыргаз аусура алҵшәақәа. Уи азкын Аԥсни, Ермантәылеи, Аахыҵ-Уаԥстәылеи рҵарадырра адгылара, аиӷьтәра. Ари апроект нарыгӡоит Урыстәылатәи Афедерациа аҭҵаарадырреи иреиҳау аҵареи Рминистрра анапхгарала. Нхыҵ-Кавказтәи Афедералтә университет активла аус ацнауеит Аԥсны аҵара Аминистрра 2014 шықәса аахыс.
Абри ауниверситет иабзоураны еиуеиԥшым амаҭәарқәа рыла ашколқәа рҵаҩцәа рквалификациа ашьҭыхразы акурсқәа мҩаԥган.
Мақсим Трофимов Аԥсны Аиҳабыреи аҵара Аминистрреи ҭабуп ҳәа реиҳәеит апроект анагӡара аганахьала активла иҟарҵо ацхырааразы.
Аԥыза-министр Алеқсандр Анқәаб рыхә ҳаракны ишьеит аԥсуа ган аҭҵаарадырра-методикатә цхыраара аҭаразы Нхыҵ-Кавказтәи Афедералтә университет аректорати аспециалистцәеи рҽазышәарақәа.