Аԥсны аихамҩа анџьныр хада Леонид Кәыруа иажәақәа рыла, аихамҩа аиҭашьақәыргыларазы акомплекстә усурақәа аибашьра ашьҭахьтәи аамҭа зегьы азы имҩаԥырымгацызт. Аусурақәа мҩаԥысуеит 2100-тәи акилометр инаркны 2154-тәи акилометр аҟынӡа.

Аспециалистцәа арельсқәа рыԥсахуеит, аихабетонтә шпалқәа шьҭарҵоит, амҩа дырҽеиуеит, ахаҳәсса ықәрыԥсоит. Ҷыдала ахшыҩзышьҭра аҭоуп иажәхьоу арельсқәа, ашпалқәа, аибаркыгақәа рыԥсахреи амҩа агеометриатә хышәара-ҵышәареи. Иара убасгьы астанциатәи адкыларатәи мҩақәа реиҭашьақәыргылара мҩаԥысуеит. Очамчыра 950 метра инаӡо аихамҩаҿы иҟоу астанциа № 5 аиҭашьақәыргылара хыркәшоуп.

Мшаԥымза анҵәамҭазы иазԥхьагәаҭоуп авагон-мҩашәага аара.

Аиҭашьақәыргыларатә усурақәа мҩаԥысуеит Аԥсны аихамҩа абиуџьеттә ԥарақәа рыла.

Уи адагьы адгьыл аихамҩақәыԥсақәа, аҭагәаҩарақәа, аӡымҩахгагатә ргыларақәа рҭагылазаашьа гәарҭоит, аиқәымшәарақәа ианаамҭоу раарԥшреи раԥыхреи рзы.