Афорум «VISIT АPSNY» апрограмма аҳәаақәа ирҭагӡаны, октиабр 15  рзы акультура-усуратә платформа «ГӘЫМА» аҿы имҩаԥысыз  аԥсуа чыс агьамабаратә фестиваль «Аԥсны агьама» аҿы аҭыԥантәи аарыхыҩцәеи афермерцәеи иҭрыжьыз афатә аалыҵқәа рыдгалара мҩаԥган.

Анна Калиагина лажәақәа рыла, афорум ахықәкы хадас иамоу ашықәс зегьы атуристтә аамҭа арҿиара ауп.

«Ҳара ҳхықәкы хаданы иҟоу ашықәс зегьы атуристтә аамҭа аҿиара ыҟазарц ауп. Ҳасасцәа зыҩаӡара ҳараку аԥсшьара роурц ҳҭахуп. Аҵыхәтәантәи ашықәсқәа рзы еиуеиԥшым амаҵзурақәеи аԥсшьарҭатә ҩнқәеи рыҩаӡара шьҭаҳхит. Иҵегь иҟаҳҵаша ыҟоуп. Атуризм аҿиара – ари хадара злоу комплекстә усуроуп. Сара  агәра ганы сыҟоуп ари абизнес аҿы иҟоу зегьы ҳфорум рыҽшаладырхәуа, адгылара шарҭо»,– ҳәа лҳәеит Анна Калиагина.

Афорум аҳәаақәа ирҭагӡаны иара убас амҩаԥгара азгәаҭан аҭыԥантәи аҭыжьыҩцәеи аиқәыршәаҩцәеи раалыҵқәеи, ртауарқәеи,  рмаҵзурақәеи рцәыргақәҵа.