Еиҳарак ари ацәыргақәҵа хықәыс иамоуп аҭыԥантәи анаплакыҩцәа адгылара рыҭара, русумҭақәа рыҭира, иара убасгьы апартниорцәа рыԥшааразы ирыцхраауеит.
Аамҭалатәи ацәыргақәҵа аҩбатәи амш аҽны арахь иаҭааит атәыла Ахада Бадра Гәынба, иара убас жәларбжьаратәи аекономикатә форум аҽалархәраз иааиз асасцәагьы.
Аԥсуа напҟазацәа иаԥырҵаз аусумҭақәа гәахәарыла иахәаԥшуан, иаархәон аԥсшьаҩцәа. Ирацәоуп убла хызкуа ацәа иалху, анышәаԥшь иалху. Амҿлых знапалаку ҳҟазацәа ицәыргақәырҵеит ахьа, араса, аџь, алакациа, ашә уҳәа ирылырхыз анхамҩатә маҭәахәқәа, аахәаҩ илшон араҟа иалихырц амҳабысҭа, аҟәыдыршьшьыга уҳәа игәы иалнахуа зегьы.
Араҟа иубон аҭыԥанти анаплакцәа «Анра» ахьӡҵаны иҭрыжьыз акосметика, аефиртә хәша, асапын фҩы хаа, адәыхьқәа.
Аҭыԥ ду аанныркылоит асасцәа бзиа еицырбахьоу аԥсуа чыс хаақәа: алаҳарҩа, аџьынџьыхәа, аԥсуа џьыка, аӡы хаақәа, аҵәарҩа убас иҵегь. Беслан Воуба ицәыргақәиҵеит аԥсуа жәлар рарҳәагатә инструментқәа: ачамгәыр, аҩымаа, ахымаа.
Лассы иааираны иҟоу амшаԥныҳәагьы авармыжьит анаплакцәа, араҟа аҭааҩцәа иаархәон агиԥс иалхны иблахкыгаха иҟаҵаз асаан дуқәа, ацәашьы зҭадыргыло, еиуеиԥшым ачысмаҭәахәқәа.
Аԥсуа еснагь ҳаҭырла иныҟәигоит абџьар хьшәашәа ҳәа изышьҭоу аҳәызба, аҳәа, аҟама. Асасцәа ирзымбатәбаран хыԥхьаӡара рацәала анаплакҩы ицәыригаз аҳәызбақәа, араӡны иагәылҷҷаауаз аҟама чаԥақәа. Ҳәара аҭахым, агәаҳәара змаз ирылшон урҭ раахәара. Ицәырган иара убас амода знапы алаку аҿар рыӡахымҭа лыԥшаахқәа. Урҭ зегьы ҳмилаҭ хаҿра, аԥсуа культура рнырԥшуп.
Ашҭа ҭбааҿы иқәыргылан абаннер дуқәа, урҭ иаҳзаадыртуеит Аԥсны асоциал-економикатә ҿиара, мҽхакы ҭбаала аусура иаҿу аҳәынҭқарратә проектқәа: «Владислав Арӡынба ихьӡ зху жәларбжьаратәи аҳаирбаӷәаза», аҩызауад «Ачба иашҭа», аӡыржәтәқәа рзауад «Кристалл», ахш зауад «Молочныи двор».
Ирацәоуп иҳарҳәо абаннерқәа Урыстәылеи Аԥсни русеицура, риашьара зныԥшуа. Араҟа аҭыԥ хада ааннакылоит «Доброволец» зыхьӡу адокументтә цикл, СВО иалахәу Аԥсны аҵеицәа знырԥшу абанерқәа.
Амшын баӷәаза аган аҟны еиҿкаауп експо-цәыргақәҵа, уи араҟа иҟазаауеит акраамҭа.
Наира Сабекиа