Аҵара ахьысҵо Е.Ешба ихьӡ зху ахәбатәи абжьаратә школ аҿы аҵаҩцәа аԥсуа бызшәа рдыруеит, аха абжеиҳараҩык ацәажәараҿы рхы иадырхәо аурыс бызшәоуп. Акыраамҭа саргьы ус ҟасҵон. Аха уажәазы еилыскаауеит ари амҩа шиашам, убри азоуп схатәы бызшәа сҵарц азы аҽазыҟаҵарақәа рахь схы зсырхаз.
Ус, ҽнак зны, ааӡара аганахь ала аус зуа арҵаҩы Ииа Константин-иԥҳа Џьопуа слызҵааит: «Аԥсуа бызшәа аҭагылазаашьа шәышԥахәаԥшуеи?» – ҳәа. Лара абас еиԥш аҭак сылҭеит: «Ҳхатәы бызшәа аҭагылазаашьа хәыҷык иуадаҩушәа збоит, избанзар анкьа ахәыҷқәа раԥхьаӡа акәны ашкол ахь ианааиуаз аҷҷаҳәа аԥсышәала ицәажәон. Уажәтәи аамҭазы аиҳабыратә классқәа рҿы аҵаҩцәа ибзианы аԥсышәала ицәажәоит, аха аиҵбыратә классқәа рзы аԥсуа бызшәа даараӡа ирцәуадаҩуп. Актәи аклассқәа рҿы иҳадаҳкылаз ҩажәихәҩык, рҟнынтә хҩык, ԥшьҩык ибзианы аԥсышәала ицәажәоит, егьырҭ даара ихьысҳаны ирдыруеит ҳхатәы бызшәа», – лҳәеит. Сырҵаҩы лҭак сгәы снархьит, избанзар аԥсуа милаҭ ҳзы ари проблема дууп.

Сгәы иаанагоит абри апроблема аӡбаразы аҭаацәараҟны ани аби аԥсышәала ицәажәозароуп, рхәыҷқәа рхатәы бызшәа агәыбылра ддырклароуп, раԥхьа иргыланы иара рдыруазароуп, анаҩс егьырҭ абызшәақәа ирызхьаԥшыр рылшоит.
Сгәаанагарала ахәыҷқәа аԥсуа бызшәа зцәыцәгьоу, агәаҳәара рымаӡам аҵара, урҭ аинтерес дыркразы апрограмма шьақәгылазароуп еиҳа имариоу, илассу ажәеинраалақәеи, ажәабжьқәеи рыла. Иара убас, ашкол аҿы аԥсуа бызшәа иазкны ианымҩаԥысуа еиуеиԥшым аусмҩаԥгатәқәа рхы рыладырхәуазароуп ҳхатәы бызшәа здыруа рнаҩс иззымдыруагьы. Урҭ издыруа ирҿыԥшуеит, рҽазыркуеит жәеинраалак иадымхаргьы аҵара, агәынкылара. Абас хәыҷы-хәыҷла шьаҿак ԥхьаҟа иҟарҵоит абызшәа адырразы, аҵаразы.

Сариа Ҷанԥҳа,
Е.Ешба ихьӡ зху
Аҟәатәи абжьаратә школ №5
10-тәи акласс аҵаҩы