«Ҳгәы иҭоуп ашә, ахш, ахарҵәы рыҟаҵара. Иахьазы аусуразы амаҷ ауп иаанхаз. Амыругақәа аҿакуп, амонтажтә усурақәа ахыркәшарахь инеиуеит. Ҩымз рыла аалыҵ агәаҭаратә хәҭа аҭыжьра ҳалагарц ҳгәы иҭоуп», – ҳәа иҳәеит Ӡаԥшьба.

Уи иажәақәа рыла, азауад аҿы иҟалоит 35 усурҭа ҭыԥ, азауад ихаҭәааны аусура иналагалак даҽа жәа-усурҭатә ҭыԥ ацлоит.

Иқәыргылоу аиқәыршәагақәа ахш лага аус аднаулоит.

Ахш лага Ирани Белоруссиеи рҟынтәи иааргалоит, аиқәшаҳаҭрақәа рыбжьарҵахьеит.

«Ахш лага иалху аалыҵ аԥышәаратә хәҭа ааҳгахьеит», – иҳәеит Ӡаԥшьба.

Азауад уахыки-ҽнаки иалагӡаны жәа-тоннак аалыҵ ҭнажьлоит.

Анаплакы ахарџьынҵа 1,48 млрд мааҭ рҟынӡа инаӡоит. 1,188 млрд мааҭ азоужьын иҷыдоу акредит аҟынтәи, иаанхаз ахатәы ԥаратә хархәагақәа роуп.

Азауад ақәӡара 3 нызықь ԥшьыркца метра ҟоуп. Азауад аҵакырадгьыл – 2,2 гектар.