Ельчин раԥхьаӡа акәны Аԥсныҟа дааит 16 шықәса анылхыҵуаз.

«Сыԥсҭазаара, сыҭҵаарадырра зегьы сыԥсадгьыл иузаҟәымҭхауа иадҳәалоуп. Уажәы Ҭырқәтәыла сынхоит, аха сара сзы ԥсадгьылк ауп иҟоу, уи сҭоурыхтә ԥсадгьыл ауп, сыжәлар рзы хәарҭара злоу кыр сылшозар, хымԥада, инасыгӡоит», – ҳәа инаҵшьны иазгәалҭеит лара.

Ельчин жәларбжьаратәи адипломатиа дадҳәалоуп. Лара Еиду Амилаҭқәа Реиҿкаара аҳәаақәа ирҭагӡаны активла аусура лгәы иҭоуп.

«Сынтәа еиҭа сгәы иҭоуп Женева ақәгылара. Хадара злоу азҵаарақәа иреиуоуп Аԥснытәи аспециалистцәа ҿарацәа Еиду Амилаҭқәа Реиҿкаара асистема ралахәхаразы ацхыраара рыҭара. Уаҟа ҳхаҭарнакцәа рыҟазаара акырӡа аҵанакуеит», – ҳәа азгәалҭеит Ельчин.

Лара Аԥсны аҿар ирзеиӷьалшьеит аманшәалара, рыԥсадгьыли рыжәлари реизҳазыӷьаразы русураҿы ақәҿиарақәа.

Ельчин Аӡынба Аднан Мендерес Ауниверситет дадоцентуп, жәларбжьаратәи аизыҟазаашьақәа рзы дыспециалиступ, Ҭырқәтәыла иҟоу аԥсуа диаспора ахаҭарнакцәа дреиуоуп.