Акоммуналтә усбарҭақәа русзуҩцәа абаҟа акәша-мыкәша еилдыргоит, апостамент дрыцқьоит. Иара убас ашьаҟамҩатә хаҳәҟьаԥс рыԥсахуеит.

«Арҭ аусмҩаԥгатәқәа абаҟа аиҿкаара адагьы хықәкыс ирымоуп аҭоурыхтә ҭынха ҳаҭырла азнеира, ҳтәыла аԥсҭазаараҿы ароль хада назыгӡаз ауаажәларратә усзуҩы ихьӡ ахамышҭра, анаунагӡатәра», – ҳәа азгәеиҭеит Аҟәа ақалақь ахада Ҭемыр Агрба.

Аусурақәа рхыркәшара ргәы иҭоуп иналукааша аҳәынҭқарратә усзуҩ имшиира аламҭалазы (хәажәкырамза 7). Традициала ишаԥу еиԥш ари амш аҽны Ефрем Ешба игәаларшәаразы ажәлар еизоит.