Аԥсуа поезиа аҟны аӡәы диламҩашьо зхатә бжьы змаз, СССР-и Аԥсни рышәҟәыҩҩцәа Реидгылақәа, анаҩс – Аԥсны ашәҟәыҩҩцәа Рассоциациа, СССР-и Аԥсни ржурналистцәа Реидгылақәа рлахәыла Рауль Лашәриа диижьҭеи 80 шықәса аҵра иазкыз агәалашәаратә хәылԥазы мҩаԥган Д.Гәлиа ихьӡ зху Аԥсуаҭҵааратә институт аҟны.
Уи аартуа, Аԥсуаҭҵааратә институт аиҳабы Арда Ашәба дазааҭгылеит апоет, апублицист, аиҭагаҩ Рауль Лашәриа ихаҭареи ирҿиаратә усуреи. Идырреи ипрофессионалтә ҩаӡареи шыҳаракыз дазааҭгыло иҳәеит: «Рауль Лашәриа инапы иҵыҵуаз, уаҳа аԥхьара, ахәаԥшра аҭахӡамызт, уи апоезиа, аиҭагара уҳәа еилеигӡоз ахырхарҭақәа инарҷыданы редакторк иаҳасабала иусура даара иҿырԥшыган».
Апоет иԥсазаареи ирҿиареи инарҭбааны дырзааҭгылеит Аԥсны ашәҟәыҩҩцәа Рассоциациа ахантәаҩы Владимир Занҭариа иқәгылараҿы.
«Зхатә дунеихәаԥшышьа змаз, зҩымҭақәа даҽа дунеик ахь уназго, 60-70-тәи ашықәсқәа рзы аԥсуа поезиа аҟны ицәырҵыз ажәа сахьарк азҟаза Рауль Лашәриа иҩымҭақәа уанрыԥхьо хәыцра шәкы узцәырыргоит, уи иажәеинраалақәа рҵакы ҵаулоуп, еиуеиԥшым ахырхарҭақәа рахь иурхар алшоит.
Қәра дук изнымҵит, изаамҭанымкәан зыԥсҭазаара ҿахҵәаз апоет, аха ҿыгҳарала идуум, зҵакы ҵаулоу иажәеинраалақәа реизгақәа, ишәҟәқәа аԥсуа литература ихьыршәыгәқәаны иазынижьит.
Дырмит Гәлиа изку ажәеинраала акәзар, даара ажәа лыԥшаахла иаԥҵоу инарҵауланы узырхәыцуа, ҳажәлари ҳаԥсадгыли рлахьынҵа зегь гәылҭәааны ари ажәеинраала ацәаҳәақәа ирылубаауа, ианыԥшуа иҩуп. «Слахьынҵа аҿаԥхьа», «Сдоуҳа ашҭа» уҳәа иргәылоу ажәеинраалақәа рыԥхьарахь уиасаанӡа, урҭ рыхқәа иуарҳәо мацарагьы акыр аанагоит, рҵакы ҵаулоуп», – иҳәеит уи.
Иқәгылара хыркәшо, Владимир Занҭариа иазгәеиҭеит, Рауль Лашәриа игәы каршәны, арҿиара, ажәеинраалақәа рыҩра мацара даҿызартә еиԥш аҭагылазаашьа шимамыз, еиуеиԥшым аҭыԥқәа рҟны аусурақәа шеидибалоз.
Аиашазы, ахӡыргара зцәа иаламыз апоет, апублицист, аиҭагаҩ Рауль Лашәриа аус иуан агазеҭ «Аԥсны ҟаԥшь», «Акоммунизм ахь» рҟны еиҭагаҩыс, ажурналқәа: «Амцабзи» «Алашареи» рҟны аҭакзыԥхықәу маӡаныҟәгаҩыс. Аҵыхәтәантәи аамҭазы аус иуан Аԥсуаҭҵааратә институт алитература аҟәша аҭҵаарадырратә усзуҩыс, Аԥсны ашәҟәыҩҩцәа Рассоциациа алитфонд деиҳабын, иара убас ажурнал «Аҟәа-Сухум», агазеҭ «Еҵәаџьаа» рыҟ́әшақәа рнапхгаҩыс дыҟан.
Рауль Лашәриа иџьабааи илагалеи рацәоуп иара убас аԥсуа милаҭтә журналистика аҿиареи ашьақәгылареи рҿы. Уи Аԥсуа ҳәынҭқарратә телехәаԥшра раԥхьатәи аредактор хадас дыҟан. Иахьа Аԥсуа телехәаԥшра аефир ахь излаҭыҵуа аинформациатә дырраҭара ахьӡ «Амшеикәшара» зхәыцыз, авторс иамоу Рауль Лашәриа иоуп.
Хаҭала, Аԥсуа телехәаԥшра аҟны иусура атәы дазааҭгылеит, уи анаадырт Рауль Лашәриа аус ицызуаз афилологиатә ҭҵаарадыррақәа рдоктор Гәрам Амқәаб.
Ииасхьоу аамҭала Рауль Лашәриа ихцәажәара шицәыуадаҩыз азгәаҭо, Гәрам Амқәаб иқәгылараҿы ҷыдала инаҵшьны иҳәеит Рауль Лашәриа ихаҭареи ирҿиаратә усуреи шеиҿкааз: «Ахӡыргара ицәаҩамызт, иажәа раӡан, ииҳәоз ҳәан, ииуаз уын, иажәеи иуси еимадан.
Ирҿиаратә усура акәзар, ҭакԥхықәрала дазнеиуан, ибызшәа цқьан, ибеиан, инапы иҵыҵуаз аматериал уаҳа азааҭгылара аҭахымызт.
Рауль Лашәриа иԥсҭазаара зегь ааидкыланы ижәлар рымаҵ аура иазкын, уи ирҿиара, иусура зегьы аҟны ианыԥшуан ижәлари иԥсадгьыли рахь имаз абзиабара.
Иуаҩра, ихаҭара даара иҳаракын, аԥсуара, аламыс, ауаҩра аныҟәгара дашьҭан, урҭ аԥҟарақәа еилазхәоз, ахымҩаԥгашьа ицәаҩамызт. Хаҭала сара исгәалашәом, ҳусеицура аамҭазы, аколлектив аҟны аӡәы игәы нирхеит, иахәҭам ажәак иеиҳәахьан ҳәа. Рауль ҟазшьала зегьы дырнаалон ибаҩхатәреи ипрофессионалтә ҩаӡареи инарҷыданы.
Гәрам Амқәаб иажәақәа рыхшыҩҵак шьақәырӷәӷәо акыршықәса инеиԥынкыланы Аԥсуа телехәаԥшраҿы аус зуаз, хаҭала, Рауль Лашәриа аус ицызуаз Ҭина Қорсаиаԥҳа иазгәалҭеит Рауль уаҩык иаҳасабала даара иҟазшьа штатаз.
«Ашьац иаӷрамгылоз» – ззырҳәоз иакәын Рауль Лашәриа. Уи атекстқәа анириашозгьы, «ишыҟоугьы бзиоуп, аха абас иҳариашар еиӷьуп, уара угәы ишԥаанаго» ҳәа аӡәы игәы нымхарц дразҵаауан, ишабалак акәымкәан, даара ихы ҳаҭыр ақәҵаны, ламысла, уаҩышәала дырзыҟан зегьы». Лцәажәара хыркәшо даԥхьеит иажәеинраала. Р.Лашәриа, «Дырмит Гәлиа» .
Апоет, ажурнал «Алашара» аредактор хада Анатоли Лагәлаа иқәгылараҿы иазгәеиҭеит ажәеинраалақәа инарҷыданы, Р.Лашәриа даара ибзианы ишиқәҿиоз апародиа, иара убас дазааҭгылеит Р.Лашәриа ихаҭара, иаамысҭашәара аазырԥшуаз аԥсҭазааратә хҭысқәа.
Аԥшҩы илзикыз «Нато» захьӡыз астатиа, анаҩс, Рауль Лашәриа ажәеинраалагьы злихыз аԥхьаҩцәа даара ибзианы ирыдыркылаз шакәу азгәаҭо, Анатоли Лагәлаа даԥхьеит уи ажәеинраала аҟнытә цәаҳәақәак. Иажәа хыркәшо «усҟан Рауль Лашәриа ажәеинраала «Нато» азы агонарар ҩынтә еиҳатәны изыршәеит. «Аԥшҩы Нато леиҳа сара аԥара сырҳаит» ҳәа алаф иҳәон» – иҳәеит уи.
Раули Лашәриа гәаҭалагьы, дәахьылагьы даара иԥшӡаз, ибеиаз уаҩын. Уи иаамысҭашәара рныԥшуан ихымҩаԥгашьеиԥш ирҿиарагьы.
Иажәеинраалақәа рҵакы ҵаула иаҵубаауеит, шамахамзар, амистикатә ҟазшьа, урҭ ухьадырԥшуеит иҩбоу ахшыҩзцара, ахь», – лҳәеит апоет, ахәыҷтәы журнал «Амцабз» аредактор хада Гәында Сақаниаԥҳа лықәгылараҿы.
Ахәылԥаз аҟны иқәгылаз апоет, ажурнал «Аԥсны аҟазара» аредактор хада Геннади Аламиа, афилологиатә ҭҵаарадыррақәа ркандидат Уасил Аҩӡба уҳәа егьырҭгьы ажәа ԥхақәа рҳәеит апоет хатәра, ауаҩы аамысҭашәа Рауль Лашәриа изкны.
Аиқәшәара ахыркәшамҭаз уахь имҩахыҵызи уи аиҿкааҩцәеи Лашәриаа рыхьӡала иҭабуп ҳәа ралҳәеит Нонна Лашәриаԥҳа. Лықәгылара хлыркәшеит лхаҭа Рауль Лашәриа изылкыз ажәеинраалала.
Алиса Гәажәԥҳа