Зыԥсҭазаара ҳхақәиҭра иахҭнызҵаз Ауаҩы лаша ихьӡ, иус дуқәа абиԥарақәа еимырдоит.
Аԥснытәи аҳәынҭқарратә университет аҟны мҽхакы ҭбаала иазгәарҭеит Владислав Григори-иԥа Арӡынба диижьҭеи 80 шықәса аҵра иазкыз амш.
Ауниверситет афоие аҟны еиҿкаан Владислав Арӡынба изкыз афотоцәыргақәҵа, урҭ аагоуп С.Дбар ихьӡ зху Аԥсны жәлар Рџьынџьтәылатә Еибашьра Аҳәынҭқарратә музеи аҟнытә.
Аԥсны Раԥхьатәи Ахада ииубилеитә хәылԥазы аартын Аԥсны агимн арҳәарала, еизаз зегьы минуҭктәи ҿымҭрала дыргәаладыршәеит Владислав Григори-иԥа Арӡынба.
Аиубилеитә хәылԥазы ашҟа иааит: Аԥсны Аԥыза министр Владимир Делба, уи ихаҭыԥуаҩ Џьансыхә Нанба, Жәлар Реизара Аиҳабы Лаша Ашәба, акультура аминистр Даур Ақаҩба, аҵарадырра аминистр Хана Гәынба, Россотрудничество ахаҭарнак Татиана Степанова, Аԥсны абыргцәа рхеилак аиҳабы Аполлон Думаа, Аԥсны Афырхаҵа Аслан Кобахиа, аибашьра ахьӡ-аԥша Аҳәынҭқарратә музеи аиҳабы, Аԥсны Афырхаҵа Мзиа Беиа, Аԥсны Раԥхьатәи Ахада иԥшәмаԥҳәыс Светлана Џьергьениа. Владислав Арӡынба ихьӡ анаунагӡатәраз, ҳхақәиҭра зхы ахҭнызҵаз ҳҵеицәа ргәалашәараз ауаҩы илымшара лылыршо иааиуа Гугуца Џьыкрба.
Аԥснытәи аҳәынҭқарратә университет аректор академик Алеко Гәарамиа аиубилеитә хәылԥаз аҟны дазааҭгылеит ҳажәлар раԥхьагыла Владислав Арӡынба иахьа иҳамоу ахақәиҭра аагаразы илиршаз шшьардаӡоу. Уи иҵарадырра, ихаҭара, иԥсадгьыл ашҟа имаз абзиабара ду ҳара иахьа еиҵаҳааӡо аҿар ирылаҳааӡароуп, Владислав дмыԥсӡеит, уи ихәҭак ҳара иҳалоуп», – иҳәеит иара.
Асценаҿы астудентцәа аԥхьон инеимда-ааимдо атәыла Ахада изкны Витали Амаршьан, Рушьбеи Смыр уҳәа ҳаклассикцәа иаԥырҵаз ажәеинралақәа. Аԥсны зҽаԥсазтәыз артист Роза Чамагәуа лнапхгарала астудентцәа инарыгӡеит ашәа «Шәнеибац».
Аиубилеитә хәылԥазы еиҿызкааз иҭабуп ҳәа раҳәо дықәгылеит Светлана Џьергьениа. Лара ирзеиӷьалшьеит аҿар ҵарадыррала еснагь аԥыжәара рымазарц асеиԥш иҟоу аиԥыларақәа апатриотизмра шрыланааӡо. «Уԥсадгьыли ужәлари ирыхәҭоу анынаугӡа уи ԥхьаҟа унанагоит, уарӷьацоит», – лҳәеит лара.
Ауниверситет аректор ихаҭыԥуаҩ анаукатә ҟәша аиҳабы Џьулетта Адлеиба лықәгылараҿ иазгәалҭеит ашықәс зегьы ауниверситет аҿы ишымҩаԥысуаз Аԥсны Раԥхьатәи Ахада иԥсҭазаареи инаукатә рҿиареи ирызкыз аусмҩаԥгатәқәа рацәаны, ари иахьатәи аиԥылара сынтәатәи ашықәсазтәи хыркәшаратә усумҭоуп, насгьы иалылкааит ауниверситет аушьҭымҭа, аҭоурыхдырҩы Џьамбул Инџьгиа Владислав Арӡынба изкны афильм шаԥиҵаз.
Анаҩсан аиубилеитә хәылԥазы иалахәыз идырбан «Владислав Ардзинба. Искусство возможного», зыхьӡу Џьамбул Инџьгиа иҭихыз афильм.
Аиубилеитә хәылԥазы ахыркәшамҭаз Владислав Арӡынба изкны ажәа иҳәеит Аԥсны абыргцәа рхеилак аиҳабы Аполлон Думаа. Уи гәыблыла игәалаиршәоит Аԥсны аҵеи лашеи иареи реиниарақәа ртәы, уи иазкны астатиақәагьы иҩхьеит. «Владислав Арӡынба ихы зқәиҵаз аус башамхеит. Аҿар зегьы ишәуалԥшьоуп ихьӡ анаунагӡатәра, пату ақәҵашьа шә́ақәшәаат», – иҳәеит иара.

Наира Сабекиа