Print this page

Афестиваль «Ҭагалан агьама – афеихоа» мҩаԥысуеит Аҟәа

Абҵара 30, 2025 15

Аҟәа, амҳаџьырцәа рыԥшаҳәаҿы иаатит агастрофестиваль «Ҭагалан агьама - афеихоа».

Аусмҩаԥгатә гәыцәс иамоуп «Аҟәа ашҭа», уаҟа Аҟәеи егьырҭ араионқәеи рҟынтәи иреиӷьу ақьафурҭақәа иӡырыргоит амилаҭтә чыс. Афестиваль аҳәаақәа ирҭагӡаны итрадициатәу ачыс хкқәа рыҟаҵаразы амастер-классқәа мҩаԥгахоит.

Иҷыдоу астендқәа рҿы асасцәа ирбар рылшоит аԥсуа қыҭанхамҩа иамоу аихьӡарақәа: ацха, амандарин, афеихоа, ахәырма, араса. ААУ астудентцәа-атехнологцәа раалыҵ ӡырыргоит (ачаи, аҩы).

Аԥсны амилаҭтә чысқәа рқьафурҭақәеи аҩы ахьыҟарҵо аҭыԥқәеи рыбжьара иреиӷьу ралԥшааразы еиуеиԥшым аноминациақәа рыла аицлабрақәа мҩаԥыргоит.

Афестиваль аиҿкааҩ Хьыбла Возба лажәақәа рыла, аусмҩаԥгатә хықәкы хадас иамоуп аԥсуа культура аӡыргара, аҭыԥантәи ақьафурҭақәа адгылара рыҭара.

«Ҳара ҳаигәырӷьоит раԥхьаӡатәи ҭагалантәи агастрофестиваль ахь шәымҩахыҵра! Иахьа, ари ашҭа ссир аҿы шьыжьы аахыс еизеит аныҳәатә гәалаҟара змоу асасцәа рацәаҩны.

Сынтәа Аҟәа, Багаԥшь ихьӡ зху ашҭаҿы агастрофестивальқәа ҩба мҩаԥаагахьеит, аҭааҩцәа иҟарҵаз ахҳәаақәа идырҵабыргуеит, ас еиԥш иҟоу аусмҩаԥгатәқәа азҿлымҳара шрымоу. Атуристтә сезон хада анынҵәалак ашьҭахьгьы Аԥсны аҭааҩцәа рхыԥхьаӡара аизырҳара ҳхықәкы хадақәа ируакуп», – ҳәа азгәалҭеит лара.

Афестиваль аҳәаақәа ирҭагӡаны ишьақәыргылоуп азҿлымҳара змоу арҵаратә программагьы.

«Афестиваль аҿы асасцәа еилыркаар рылшоит итрадицитәу ачыс аԥсуаа рқәрарацәа ишаныԥшуа. Иҷыдоу азҿлымҳара аҳҭоит иуникалтәу ашәыр - афеихоа. Араҟа иҟоуп ақыҭанхамҩа аинститут ахаҭарнакцәагьы, урҭ афеихоа еиҭаҳатәқәа аҭиразы иааргеит. Ҳгәыӷуеит афестиваль асасцәа урҭ аахәан рбаҳчақәа рҿы еиҭарҳап ҳәа», – лҳәеит Хьыбла Возԥҳа.

Афестиваль еиҿнакааит апроект «Агастрокультура» агәыԥ, Аԥсны Аҳәынҭқарреи Урыстәылатәи Афедерациеи рнапхгаҩцәа рыцхыраарала.