Аԥсны Аҳәынҭқарра Ахада Бадра Гәынба ҭелла Иауз Аҭрышба идиныҳәалеит Афедерациа анапхгаҩыс иалхра, изеиӷьишьеит ақәҿиарақәа ҳауаажәлар рхаҭарнакцәа инапы ианырҵаз аус анагӡараҿы.

"Аԥсны ашәарҭара ианҭагылаз бџьаршьҭыхла уашьцәа урывагылан уԥсадгьыл ухьчон , агәраганы сыҟоуп Афедерациа анапхгараҿы аихьӡара дуқәа шаауырԥшуа", - азгәеиҭеит Бадра Гәынба.

Аԥсны Ахада аҭел дылзасит иара убас Афедерациа анапхгарахь зкандидатура ықәгылаз Елиф Таԥшьԥҳа ( Маршьанԥҳа ). Бадра Гәынба уи ҭабуп ҳәа леиҳәеит аусуразы, иазгәеиҭеит араҟа иаиааизи иаҵахази шыҟам.

"Аԥсны инхогьы Ҭырқәтәылеи егьырҭ атәылақәа рҿы инхо ҳџьынџьуааи жәларык ҳауп, ҳажәҩахыр еибыҭаны ҳҳәынҭқарра аҿиареи, ҳбызшәеи ҳмилаҭтә хаҿра аиқәырхареи рус аҟны",-иҳәеит Бадра Гәынба. Аҳәынҭқарра Ахада Афедерациа Ахада ҿыц Иауз Аҭрышбеи Елиф Таԥшьԥҳаи (Маршьанԥҳа) Аԥсныҟа ааԥхьара риҭеит.