Убас еиԥшҵәҟьа иԥсҭазаара аҽаԥсахит сара сыззааҭгыларц исҭаху саб иҭоурых.

Ферызба Даур Радион-иԥа  афизика-математикатә факультет 4-тәи акурс дастудентын Аџьынџьтәылатә еибашьра аналагоз. Урыстәыла дыҟан.

«Аибашьра шалагаз анеилыскаа, иаразнак исыӡбеит хатәгәаԥхарала еибашьуаз раԥхьаӡатәи агәыԥқәа руак срыцны сыԥсадгьыл ахь схынҳәырц», – иҳәоит иара.

Мусса Дауров инапхгарала Дамхәырцтәи ашьхахыҵырҭа дахысны,Аԥсныҟа дааит.Еиуеиԥшым арратә усмҩаԥгатәқәа дрылахәын.

«Аибашьраан имариаз мшы ыҟамызт, аха зегьы реиҳа ицәгьан  ԥхынгәынмза 4, ари аҩбатәи сымшироуп», – иҳәоит еснагь саб. Саныхәыҷыз аахыс еилыскаар сҭахын ус зиҳәоз. Аха сызҵаарақәа рҭакс «бандухалак ибзеиҭасҳәоит» ҳәа нсаҭеикуан.

Аамҭа цеит, сызҵаарақәа рҭакқәа соуит, еилыскааит абысҟаамҭа иҿымҭра зыхҟьаз.

Аҳабҩык акрызҵазкуаз ҳаракыран, убри аҟынтә саб дызлаз ацхырааразы ирышьҭыз агәыԥ "Горец"ибзиан иазыҟаҵан. « Ари ахҭыс иагьа уазыҟаҵазаргьы даара ицәгьоуп, азныказгьы иҟалаз ҳзеилымкааит",- иҳәоит саб.

 Еиуеиԥшым абџьар ахкқәа рыла аӷацәа аверталиот иеихсуа иалагеит. Ҳаибашьцәа аҭыҵха рымҭакәа агранатамиот ала аверталиот иеихсит, иаразнакгьы амца акит.17-ҩык уа иҭаблит, иҭыҵызгьы ибылны, ахәрақәа рыманы ауп ишҭыҵыз.

«Уи агәыԥ аҿы исыцын сан лаҳәшьаԥа Ҭемыр Харчлааи,  иаб Валери Харчлааи (Седои) ҳәа зарҳәоз ,иара убасгьы ҳаншьа Зурик ",– иҳәоит уи.

Аибашьцәа рҭагылазаашьа даара иуадаҩын, аха агәымшәара аарԥшны ишрылшоз ала аӷа иҿагылан. Шромантәи ҳаруаа ианеилыркаа, агәыԥ амацәаз ишҭашәаз, аминаршәгала ахысра иалагеит. Уи иабзоураны ҳибашьцәа ироуит алшара ахәра ӷәӷәақәа зауз аҷкәынцәа ирыцхрааны ралгара.

Саб ишиҳәо ала,  иашьа Ҭемыр  иӷәӷәаны дыблын,  ихала дызцо дыҟамызт. «Саргьы сыблын, аха схы сахәартә сыҟан.Сҩызеи сареи ҳаицхырааны  Ҭемыр абна аҟынӡа  днаҳгеит», – игәалаиршәоит саб, уи амш мыжда атәы еиҭаҳәо. Уа гәыԥла рҽеидыркылеит, 2-3 сааҭ аиҿахысра цон,нас ироуит алшара аӡы ирны ицартә еиԥш.

"Аӡы сырны санцоз ауп иангәасҭа, аснаипер хы сықәшәан сшыҟаз.Убасҟак сгәы азааигәара ажьы ҭнажәеит, уҭаҷкәым нҭашәо аҟынӡа", – иҳәоит иара. Аӡы ианыр нахыс, ихәны иҟоз цхыраарада ишырзымгоз еилыркааит. Убри аҟынтә руаӡәк дрышьҭуеит ҳара ҳтәқәа рахь. Аха  ҳаруаа рҿы даннеи, дшәаныуоу џьшьаны игәра ргаӡом, дытҟәаны дыргоит. Агәыԥ ихабар анырымба, даҽа шьоукы рышьҭуеит. Уи зегьы аамҭа агеит, идыршар акәхеит. Амшгьы цасҳәа иауазшәа, ауха ақәа ауит. 

46-ҩык рыла ишьақәгылаз адесант аҟынтәи саб дызлаз агәыԥ 14-ҩык еицалҵуеит,3-ҩык даҽа хәымш рышьҭахь иалҵит, 29-ҩык фырхаҵарыла иҭахеит.

 Аҵыхәтәан саби иашьеи иара убасгьы рҩыза ҷкәын Гела Коҵобаиеи рбылрақәеи рыхәрақәеи ахьыхьанҭаз иахьҟьаны ирышьҭуеит Москваҟа, Вишневски ихьӡ зху абылратә центр ахь. Уа Гела иԥсҭазаара далҵуеит. Саб – Ферзба Даури  иашьа Ҭемыр Харчлааи  ҩымз Москва ахәышәтәырҭаҿы ишьҭан.

Саб Аџьынџьтәылатә еибашьраан иоуз ахәрақәа ирыхҟьаны  2-тәи агәыԥ аинвалидра имоуп. Ианашьоуп Леон иорден

Лаура Ферызба,

афилологиатә факультет

ажурналистика аҟәша

2-тәи акурс астудент