Ажурнал «Аԥснытәи аԥсшьарамшқәа» («Абхазские каникулы») аԥҵаҩы, аредактор хада – еицырдыруа аԥсуа поет, алитератураҭҵааҩы Владимир Платон-иԥа Анқәаби, аҿар реиҵааӡараҿы зџьабаа, маҷым еиҳау аҵараиурҭа арҵаҩы, аҵарауаҩ Лиудмила Арзамеҭ-иԥҳа Хьыббеи рыԥҳа еиҵы Риҵа Анқәаб лоуп.

Риҵа Владимир-иԥҳа аҵыхәтәантәи ашықәсқәа рзы лҵарадырратә усура инамаданы аҳәаанырцә дынхоит. Асоциалогиатә ҭҵаарадыррақәа дырдокторуп, Европатәи ҳәынҭқаррақәак рҟны, Аԥсны ахәаахәҭра – ааглыхратә палата дахаҭарнакуп. Ҳтәыла аӡыргаразы имҩаԥылго аусмҩаԥгатәқәа маҷым. Убарҭ ируакуп ари апроектгьы.

«Атуризм Аминистрра аусура ахырхарҭа хадақәа иреиуоуп аимиџьтә политика. Уи иамҽханакуеит акыр иҭбаау ауснагӡатәқәа реизак, амаркетинг уахь иналаҵаны. Аинформациатә ҵакыра, авеб-саитқәа, ажурналқәа, агазеҭқәа, асоциалтә ҳақәа уҳәа амаргетинг аинструмент хадақәа иреиуоуп.  «Аԥснытәи аԥсшьарамшқәа» («Абхазские каникулы») — ари иуникалтәу журналуп, уаҟа атуризм азҵаарақәа рылацәажәара анаҩс, урыстәылатәи атуристтә аалыҵқәа Аԥсны рӡыргарагьы мҩаԥнагоит – ҳәа азгәеиҭеит Аԥсны атуризм аминистрра аусзуаҩ Ҭарашь Хәытаба.

 Ажурнал аредактор хада Риҵа Анқәаб ари аҭыжьымҭа егьырҭ излареиԥшым дазааҭгыло: «Сара акыр аамҭа аҳәаанырцә сынхон, анҭыҵынтәи избон Аԥсны аӡыргаратә ҭыԥыркра шымҩаԥысуа. Рыцҳарас иҟалаз, ҳара ҳаҵахоит аинформациатә структурақәа жәпакы рҿы. Ажурнал «Аԥснытәи аԥсшьарамшқәа» («Абхазские каникулы») ииашоу аресурс иахыҵхырҭаны иҟоуп. Иишоуп, ҳара Аԥсны аимиџь ҳнапы алакуп, атуристтә обиектқәа ҳрыхцәажәоит, аха уи мацара акәӡам  аԥхьаҩцәа ҳжурнал  иадзыԥхьало. Ҳара ҳжурнал аҿы иҟоуп ҳауаажәлар иреиӷьу рҟазшьақәа аазырԥшуа арубрикақәа.  Убас, актәи аҭыжьымҭа аҿы иҟоуп арубрика «Анцәа иуасиаҭқәа рнаунагӡара зыхьчо аԥааимбарцәа» («Хранители Бога в Вечности»). Араҟа ҳара абыргцәа ҳрыҿцәажәоит. Шәара асоциалтә ҳақәа рҿы џьаргьы ҳжурнал аҿы еиԥш иҟоу, ари аҟара иҵаулоу, аинтерес, аԥхарра зҵоу аинформациа шәзымԥшаар алшоит», – лҳәеит лара.  

 Ажурнал «Аԥснытәи аԥсшьарамшқәа» («Абхазские кникулы»)  актәи аномер 1000 екземплиар атираж аманы иҭыҵит. Иазԥхьагәаҭоуп иара убас ажурнал англыз бызшәалагьы аҭыжьра.

 «Ари ажурнал аҿы аԥхьаҩцәа доусы иргәаԥхо, ирзааигәоу рыԥшаауеит хымԥада. Ҳара даара аинтерес зҵоу афырхацәа ҳамоуп. Аԥсны ҳахцәажәоит аполитика апризма, мамзаргьы астереотипқәа рыла акәымкәа, иҵабыргу ауаа рҭоурыхқәа рыла. Ҳаԥхьаҟа иазԥхьагәаҭаны иҳамоуп ажурнал «Аԥснытәи аԥсшьарамшқәа («Абхазские каникулы») Аԥсны ажәлари ибеиоу урҭ ркультуреи иахцәажәо жәларбжьаратә ҭыжьымҭаны аҟаҵара», лҳәеит –аҭыжьымҭа аредакциа аусзуаҩ Милана Жьиба.