Аҟәа ахәҭак ӡыла аиқәыршәара аиӷьтәразы Кьалашәыр аҳаблан инацҵаны даҽа аӡыҵхырҭақәа ааба ржраны иҟоуп, – адырра ҟанаҵоит аҳҭнықалақаь Ахадара аофициалтә саит.
Аҵыхәтәантәи аамҭазы, Турбаза, Синоп, Кьалашәыр аҳаблақәа ӡыла еиқәзыршәо аӡҭгагатә станциа аусураҿы аиԥҟьарақәа цәырҵуа иалагеит.
Аҟәатәи аӡыршьҭра аиҳабы Даур Ԥаҷкориа ишеиҭаиҳәаз ала, уи аӡеизакырҭақәа рҿы аӡы амаҷхара иадҳәалахеит.
«Иахьазы Турбазеи Синопи аҳаблақәа рҿы инхо ауааԥсыра акыр иаргәамҵуеит ишьақәгылаз аҭагылазаашьа. Ҳара аӡы амаҷхара иахҟьаны инеиԥынкыланы еиԥҟьарада урҭ ӡыла реиқәыршәара ҳалшаӡом», – иҳәеит иара.
Даур Ԥаҷкориа игәаанагарала, 10 мшы рыҩныҵҟа аҭагылазаашьа еиҳа еиӷьхароуп.
«Иахьазы икылаҳҵәахьеит ӡыҵхырҭак. Ҳазҭоу амчыбжь аҩныҵҟа аӡыҵхырҭа ҳаҿызаауеит. Сгәа иаанагоит, 10 мшы рыла аҭагылазаашьа акыр еиӷьхап ҳәа», – иҳәеит иара.
Аҟәа ақалақь ахада Ҭемыр Агрба Кьалашәыр ақыҭан иҟоу аӡҭгагатә станциа аҭагылазаашьеи аӡыҵхырҭа ажра иадҳәалоу аусура амҩаԥысшьеи гәеиҭеит.
«Мызкы аԥхьа Гәылрыԥшь араион ахадара ҳалархәны Кьалашәыр аӡиас аҩадатәи ахәҭа иахьаҵанакуа аусурақәа мҩаԥаагеит, уи зыҟаҵазгьы ҳастанциахь еиҳа аӡы неиуа иҟаларц азы ауп. Аха, ишаабо еиԥш, уи азымхаӡеит. Ӡыла аиқәыршәара иадҳәалоу апроблемақәа инагӡаны иӡбамкәа иаанханы иҟоуп. Убри инамаданы, инацҵаны даҽа аӡыҵхырҭақәа ааба рыжразы аӡбамҭа ҳадаҳкылеит. Аусурақәа ирылагахьеит. Урҭ анхыркәшахалак ашьҭахь, аӡхагалага ҿыц шьақәыргылахоит, анаҩс сгәы иаанагоит ауааԥсыра ӡыла реиқәыршәара азҵаара инагӡаны аӡбара алыршахоит ҳәа», - иазгәеиҭеит Ҭемыр Агрба.
Аҟәа ақалақь ахада иара убас аӡы зхы иазырхәо рхыԥхьаӡара акыр ацлареи иҟоу акоммуникациақәа акыр иахьықәсхьоуи инамаданы, аҳҭны-қалақь аӡымҩангагатә система зегьы арҿыцразы акомплекстә программа аус адулара иаҿуп ҳәа азгәеиҭеит.