Урҭ ирзыԥшуп инарҭбаау акультура-рккаратә программа, уи хзыркәшо хәҭаны иҟалоит шьҭа традициала ишышьақәгылахьоу еиԥш, рашәарамза 28 – 29 ауха Нева аӡиас ала аԥра цәаԥшь зхагылоу аԥрашхәа аиасра.
Аԥснытәи ашколқәа роушьҭымҭацәа рцара алыршахеит Санкт-Петербург агубернатор Алеқсандр Беглов хаҭала иҟаиҵаз ааԥхьара иабзоураны. Сынтәа ари аныҳәа еизнагеит Урыстәыла 28 региони Куба, Виетнам, Венесуела, Белоруссиа уҳәа уахь иналаҵаны, егьырҭ атәылақәеи рҟынтәи 6,5 нызқьҩык инареиҳаны.
«Алые паруса» — есышықәса зықьҩыла асасцәа здызԥхьало, Санкт-Петербург имҩаԥысуа зегьы реиҳа идуу аусмҩаԥгатәқәа иреиуоуп. Аныҳәатә усмҩаԥгатә алахәылацәа рзы иара убас апроект «Петербургские международные молодежные смены» аҳәаақәа ирҭагӡаны иазырхиан азанааҭалхратә, акультура-ԥсшьараамҭатә, апатриоттә уҳәа аусмҩаԥгатәқәа жәпакы.
Апроект нагӡахеит Аԥсны анапхгареи Санкт-Петербург агубернатори ирыбжьарҵаз аиқәшаҳаҭра ала.