Дмитри Вольвач даниԥылоз Бадра Гәынба иазгәеиҭеит:

 «Ҳара иаадыруеит Урыстәыла аганахьала 2022 – 2025 шш. азы Аԥсны асоциал-економикатә ҿиара апрограмма анагӡара аҳәаақәа ирҭагӡаны иаиуа ацхыраара ду атәы. Ииашаҵәҟьаны, иҳаҩсыз хышықәса ирылагӡаны, Аԥсны асоциал-економикатә ҿиара адгылара иабзоураны, шамахамзар аекономика ахырхарҭақәа зегьы рҿы алҵшәа бзиақәа ҳауит, атәыла аҩныҵҟа ахархәаразы иҭрыжьуа атауарқәеи иҟарҵо амаҵзурақәеи рыхәԥса ашьҭыҵра аҭыԥ амоуп, бжьаратәла аулафахәы ашьҭыхра, аинвестициақәа рыцлара… Урыстәылатәи Афедерациа аҟнытәи иҳауа адгылареи ацхыраареи рзы иҭабуп ҳәа раҳҳәоит Шәара аԥхьа шәнаргыланы, уи аус знапы алаку зегьы», – иазгәеиҭеит Бадра Гәынба.

 Аҳәынҭқарра Ахада ҷыдала иаликааит Урыстәыла асоциалтә усх аганахьала  Аԥсны ианаҭо ацхыраара.

Аҳәынҭқарра Ахада иациҵеит, даара акыр шаҵанакуа абизнес маҷ адгылара апрограмма ацҵара. Сынтәа уи 326 миллион мааҭ еицазоурыжьуеит.

«Ҳәарада, уи атәыла аекономика аҿиара, иҿыцу аусуратә ҭыԥқәа раԥҵара иацхраауеит», - иҳәеит Бадра Гәынба.

Урыстәыла Аԥснытәи аусдкылаҩцәа льготатә кредитла реиқәыршәара аганахьалагьы адгылара ду анаҭоит.

«Ишыжәдыруа еиԥш, иҳаҩсыз ашықәсқәа рзы зхарџьԥса 6 млрд. мааҭ инареиҳау апроектқәа рынагӡара алыршахеит. Уи адагьы, Урыстәыла Ахада Владимир Владимир-иԥа Путини сареи ҳаиԥылараҿы альготатә кредит апрограмма ацҵаразы аиқәшаҳаҭра абжьаҵара алыршан», –  иазгәеиҭеит Бадра Гәынба.

Дмитри Вольвач Аҳәынҭқарра Ахада аиԥыларазы иҭабуп ҳәа иаҳәо, инаҵшьны иазгәеиҭеит, Урыстәылеи Аԥсни рыбжьара аимадара акыр аҽшарҭбааз. Игәалаиршәеит Аԥсны Кавказтәи аинвестициатә форум ишалахәыз.  

«Ааигәа Шәара аделегациа ду шәыцны Кавказтәи аинвестициатә Форум аҿы шәыҟан. Раԥхьатәи афорум инаркны  ҳҽазаҳшәон Аԥсны ахатә ҭӡы аманы Афорум алахәхара алыршара. Сгәы иаанагоит, усҟантәи шәыҭӡы даара ибзиан, даара ихатәран ҳәа, ацәыргақәҵа асасцәа зегьы рыбла хнакит. Уи иаҭааит Михаил Мишустини Алеқсандр Новаки. Аганқәа ргәы иҭоуп излагахьоу апроектқәа рынагӡара мацара акәымкәа, аҿыцқәа нап дыркразгьы», –  иҳәеит иара.

Дмитри Вольвач иажәақәа рыла, Аԥсны адгылара ду аиҭоит Урыстәылатәи Афедерациа Ахада Иусбарҭа анапхгаҩы ихаҭыԥуаҩ Сергеи Кириенко.  

«Шәара ижәдыруеит, иара шаҟа ахшыҩзышьҭра аҭаны, инарҵауланы ареспубликаҿы иахьа имҩаԥысуа апроектқәа зегьы дахьынӡарызлымҳау.  Аԥснытәи ҳколлегацәеи ҳареи аусуратә зҵаарақәа жәпакы рылацәажәара ҳалагахьеит.  Арепсубликаҟны иҟоу Аинвестициатә Маҵзура имаҷуи ибжьаратәуи абизнес азы альготатә кредитразы азыҳәамҭақәа рыдкылара иалагоит Дмитри Вольвач.

2025 шықәсазы Урыстәылеи Аԥсни имаҷуи ибжьаратәуи анаплакра адгылара   300 млн. мааҭ инареиҳаны еицазоурыжьуеит ҳәа агәыӷра шимоу иҳәеит.

«Ҳара уи даара хықәкыс тҳамоуп. Уи азы иаԥаҳҵоит ареспубликаҿы иҿыцу имаҷуи ибжьаратәуи анаплакрақәа. Иҟазар ҟалап, иахьа аус знапы алазкхьоу, урҭ ироуа адгылара иабзоураны ашәахтә шәҟәҭагалара иахысны еиҳа зыҩаӡара ҳараку амаҵзурақәа рынагӡара азы алшара роуеит. Еилкаауп, уи атуристтә бизнес, афатә аалыҵқәа рҭыжьра, ааглыхра уҳәа шраку. Сгәаанагарала, уи акыр аҵанакуеит. Насгьы Шәара ииашаны иазгәашәҭеит, сара сзыҳәан уи акыр аҵанакуеит, Владимир Владимир-иԥа Путин шәара иҟашәҵаз ааԥхьареи арҭ ашықәсқәа рзы еицымҩаԥаагаз аусеицуреи ирыбзоураны,  иҟашәҵаз аҳәара дахаҵгылеит, ҳаргьы шьҭа  ҳфинанстә институтқәа рыла апроект дуқәа льготатә кредитла реиқәыршәара иацаҳҵалоит, уи аҵак ду амоуп», –  иҳәеит Дмитри Вольвач.