Аха Аԥсны Жәлар Рџьынџьтәылатә еибашьра (1992-1993) ашықәсқәа рзы ааха ӷәӷәа аиуит. Аԥсны аблокада ианҭакыз аамҭазы, адәқьанқәа рҟны иубоз Урыстәылантәи иаагаз ахшлых аалыҵ акәын.
Аибашьра ашьҭахьтәи аамҭақәа рнаҩс, раԥхьаӡакәны ахш зауад аусура иаларган 2012 шықәсазы. Аха еиуеиԥшым амзызқәа ирыхҟьаны аусура аанкылан иҟан, анаҩс 2017 шықәсазы еиҭацҵан аусура, аха еиҭахгьы еиԥҟьеит.
Сынтәа ахшлых аалыҵ аҭыжьра иацҵахеит. Уи аусура шеиҿкаау, насгьы иарбан хкқәоу иҭрыжьуа еилаҳкаарц ҳиҿцәажәеит ари анаплакы аиҳабы Дауҭ Амҷба. Уи иажәақәа рыла, дара хықәкыс ирыман асоветтә аамҭазы зегьы бзиа ибаны иаархәоз аҵааршәы агьама еиҭашьақәыргыланы аҭыжьра. Дазааҭгылеит, рыгәҭакы анагӡара ауадаҩрақәа шацызгьы, иахьатәи ҳаамҭа иақәшәо астандартқәа рыла, аҿыц технологиақәа алагаланы аҵааршәы агьама шьақәыргыланы ишыҭрыжьуа.
Араҟа иҭрыжьуа ахшлыҵ зегьы агьама зырхаауа иаларҵо ахәша ааргоит Иранынтәи. Уи иазгәеиҭеит, зегьы раасҭа зыҩаӡара ҳараку ахәша ҳәа ирыԥхьаӡо шаку иаарго. Араҟа иҭрыжьуеит гьамала ихаау хәы-хкыкны иҟоу аҵааршәы: ашоколадтә, афисташкатә, аҵыҵындратә, крем-бриуле, апломбир.
Арҭ аҵааршәқәа рыдагьы, араҟа иҭрыжьуеит асметана, ҩ-хкыкны иҟоу, 82,5% ахәшара злоу. Аамҭа кьаҿк иалагӡаны, арҭ ахшлыҵқәа зҭыжьра иалагаз, ргьама ауааԥсыра даара иргәаԥхоит, азҿлымҳара арҭоит ахәаахәҭырҭақәа. Аиашазы, ари аалыҵ агьама збаз даҽа ҳәынҭқаррак аҟынтә иаагоу аалыҵ аахәара иҭаххом.
Ари анаплакы аҟны аус зуа быжь-ҩык роуп, урҭ русура ԥымкрада ишьақәгылоуп
Анаплакы аиҳабы Дауҭ Амҷба иаԥхьаҟатәи игәҭакқәа дырзааҭгыло иҳаиҳәеит, иаарласны ргәы ишҭоу даҽа гьама хкыкны иҟоу аҵааршә – манго ҳәа изышьҭоу – аҭыжьра, иара убас иҭрыжьлоит ашәаӡа ҳәа изышьҭоу ачашә иаларҵо ашәхкы.
Анаплакы аалыҵ зегьы Аԥсны араионқәа рыдәқьанқәа рҟны иҟоуп. Аахәара зҭаху, агәаҳәара змоу зегьы адҵаалалар ауеит Аҟәатәи ахшлых зауад.
Стелла Сақаниа