Аԥсҭазаара иара ила иалагоит.
Аҳ Леуан иаамышьҭахь ихәҭаҵәҟьаны «аԥсҳа» ҳәа ззуҳәаша Владислав Григор-иԥа изкны зегь реиԥш саргьы исҳәаша, изҩыша даараӡа ирацәоуп. Аха урҭқәа зегьы уажәазы ара ҳзыргәылалом. Амала бзанҵы исхамышҭуа хҭыс хәыҷык шәзеиҭаҳәаны аҭоурыхгьы иазынсыжьыр сҭахуп.
Сҩызцәеи сареи Владислав Арӡынба раԥхьаӡа данаҳба, шықәсы рацәала ҳзызгәышьуаз цәаныррак ҳаашьҭнаԥааит, ҳҳәынҭқарра ахада аԥсшәа ҳаҳәаны иҳамихыз ҳнапқәа рыӡәӡәара ҳҭахымызт. Шықәсыкгьы мҵыцкәа, усҟан иҟәымшәышәӡа иаанаҳкылаз уи инапқәа аибашьраҿы аӷа ихы изышьҭымхуа дҟазҵо ҭаҷкәым раҵәаны ианыҟала, аиааиразы иҳамаз агәыӷра шаҟа иацлаз аиҭаҳәараҵәҟьа сылшарым.
Аибашьра ианалагаз ҳара Ҭырқәтәыла ҳаҟан. Аԥснынтәи иааҩуаз ажәабжь хьанҭақәа афы ҳасызшәа ҳдырдысуан, згәы каҳаны ицәажәозгьы маҷҩымызт. Убри аамҭаз, сҭаца Хәарцкьиаԥҳа Нуршьен, аибашьра ианалага адрыҩаҽныҵәҟьа илбаз аԥхыӡ дақәгәыӷны, «шәымхьаан, иаарласны аиааира ҳгоит» — ҳәа ралҳәон зегьы, насгьы илбаз аԥхыӡ сара исзеиҭалҳәон: «сареи, сеицалеи, ҳҭаца маҭәақәа ҳашәҵаны ҳгылахуп... Убасҟан, амшын еиԥш ихыҵны игылаз ажәлар аӡәы даарылҵны дааин, уашьеиҳабы иҟынтә дналаганы ҳаԥшьҩыкгьы ҳалахьқәа днаргәыӡит. Нас, шәылахь еиқәышәымҵан, иаарласны аиааира ҳара иаҳтәхоит, иҳәан, иаразнак дызлыҵыз иуаажәлар днарылалан даасцәыӡит». Аԥхыӡ ԥхыӡуп, «ԥхыӡ бзиа ббааит!» — сҳәеит, уаҳа исҳәоз. Мышқәак рышьҭахь сҭаца аԥсуа клуб аҿы дахьааиз аҭӡамц аҟны икыдыз асахьақәа руак лнапы нақәкны, «дызусҭада абри ауаҩы? Ԥхыӡла избаз абар абри иакәын» анылҳәа, аԥхыӡ иазыӡырҩхьаз зегьы ҳхәы-ҳжьы неилагылан еибаҳхәо ҳзымдыруа, ҳаиҿаԥшуа ҳаанхеит. Зсахьа кыдыз Владислав Арӡынба иакәын, сҭаца уи ахаан длымбаӡацызт, дзеиԥшроугьы лыздыруамызт. Ари ажәабжь иаразнак ажәлар иаарылаҩит. Ираҳаз џьшьахәыс ишьҭыхны, «зыӡбахә ада, хаҭала илымбацыз ауаҩы лыԥхыӡ далаланы агәырӷьаҿҳәаша леиҳәазар уи, Ҳазшаз иаҳзааишьҭыз аԥыза иоуп, аиааирагьы ҳиргоит!» — ҳәа аибыҳәара иаҿын.
Ииашаҵәҟьаны анцәа иаҳзааишьҭыз уи аԥыза, адунеиаҿ арҭ аиааира ргап ҳәа ишҳақәымгәыӷуазгьы, ажәлар аиааира дырганы аԥхыӡ аҿы ииҳәаз ажәа наигӡеит. Ианаҭахха д-Леуанхеит, ианаҭахха д-Абрыскьылхеит, ианаҭаххагьы д-Нарҭ Сасрыҟәахеит ижәлар рзы...
Ҳажәлар аҟазаареи аҟамзаареи рҳәаа аҟынтә аԥсҭазаарахь ирхынҳәны, хьӡыла-ԥшала адунеи ажәларқәа ирылазыргылаз, еилаҟәыбаса ишьҭаз, аблокадагьы зхаԥаны иҟаз аҳәынҭқарра ҿыцны ишьақәзыргылаз иара аԥыза, иара аҵеи лаша иоуп.
Агәра згоит, реиҳа ианшәарҭаз аамҭазы ишыҟаиҵаз еиԥш, Владислав Арӡынба иахьагьы адунеи иқәынхо аԥсуаа зегьы рыԥхыӡ дшалоу. Еиҭах ргәы шьҭихуеит, еиҭахгьы дшарԥыеҵәан рыԥсадгьылахь амҩа дирбоит. Уи анцәа ижәлар рзы дишеит адунеи ыҟанаҵ, ижәлар ргәаҿы, аҭоурых аҿы ихьӡ хьтәы нбанла иҿаҟәаны инхоит.
Оқтаи Чкотуа