Агазеҭ адаҟьақәа рҟны аибашьраҿы иҭахаз рымацара рыдагьы, иуԥылоит афронт аҟынтәи зыҩныҟақәа рахь ихнымҳәызгьы рсиа.

Агазеҭ «Аԥсны» аредактор хада Ахра Владимир-иԥа Анқәаб иажәақәа рыла: «Аибашьцәа рҭоурых еиҳараҩык ртәы еилкаазаргьы, аибашьра иахысны зыԥсадгьыл ахь ихынҳәыз рыхьӡқәа рыцҳарас иҟалаз уи ауп - еиқәымхеит. Уажәраанӡа аибашьра иалахәыз ақыҭауаа рхыԥхьаӡара, зеиԥш рбагак аҳасабала акәын ишыҟаз. Афронт аҿы еибашьуаз ирызку адыррақәа зегьы реизгара зыбзоуроу - урҭ рқыҭа школқәа русзуҩцәа роуп. Маҷ-маҷ урҭ рсиақәа еизгахоит, ркьыԥхьра ҳалагоит».

Иара убасгьы, Ахра Анқәаб иазгәеиҭеит аиубилеитә номер аҟны ишанылаз ақыҭақәа - Кәтол, Арасаӡыхь (Хәыхәыт Бганба иҟынтәи аматериалқәа рыла, ажурналист Инна Ҳаџьымԥҳа агазеҭ аномер иалҭаз), Мгәыӡырхәа, Ҟәланырхәа, Хәаԥ уҳәа рҵеицәа аҭоурыхқәа. Иара иажәа иацҵо иҳәеит, егьырҭ ақыҭақәа рҟынтәигьы аматериалқәа агазеҭ адаҟьақәа рҿы ишарбахо. Уаҟа аветеранцәа рыхьӡқәеи рыжәлақәеи рымацара акәымкәа, афотосахьақәеи икьаҿу аибашьцәа рнысымҩеи акьыԥхь аҟны иазԥхьагәаҭоуп. Иҭыҵыз аиубилеитә номер маҷк шәхаҿы иааирц азы, иааркьаҿны ҳазааҭгылоит уаҟа иану аматериалқәа.

 Агазеҭ иану астатиақәа руак изкуп Радион Чамагәуа. Иара х-ҩык иашьцәеи иареи аибашьра зегьы еицахысит. Урҭ рахьынтә ҩыџьа роуп зыҩныҟа ихынҳәыз. Зыԥсҭазаара ҿахҵәаз иԥҳа аиҳабы, лаб имаҭәақәа ахьеилылхуаз лылаԥш нақәшәеит мшынҵак. Ишыҟоу убри ауп, Радион Чамагәуа 1943 шықәса раахыс амшынҵа ныҟәигон, игәалашәарақәа аниҵон. Урҭ анҵамҭақәагьы раԥхьаӡакәны икьыԥхьхоит.

«Аԥсҭазаара ахьӡала» ҳәа хыс измоу астатиа - 2019 шықәсанӡа ибжьаӡыз ҳәа асиа ианырҵаз Мамед Анқәаб изкуп. Фышықәса роуп иҵуа уи анышә дахьамадоу еилкаахеижьҭеи. Аџьынџьтәылатә еибашьра Дуӡӡа аан Ленинград азааигәара фырхаҵарыла еибашьуаз аԥшыхәҩы Мирод Амԥар изкуп Борис Қаџьаиа агазеҭ аномер азы иазирхиаз астатиа. Мирод Амԥар акыршықәса ибжьаӡны иҟаз ҳәа дыԥхьаӡан. Усҟантәи ахҭысқәа ирхаанызи, иԥшааз архиви рыбзоурала аҟазараҭҵааҩ Боче Аџьынџьал илшеит алегендартә фырхаҵа иԥсҭазааратә нысымҩа аиҭашьақәыргылареи, аарԥшреи.

 Ҩыџьа аишьцәа Гагәылиаа ирызку астатиа азлырхиеит Альбина Жьиԥҳа. Елана Лашәриа лыстатиа акәзар,Ҷыка Ԥачлиа изкуп, 80 шықәса рышьҭахь раԥхьаӡакәны иара изкны аматериал акьыԥхь иабоит. Акорреспондент Илана Ԥачлиаԥҳа - ибжьаӡыз ҳәа иарбоу лабду изкны астатиа азлырхиеит.

Уи адагьы, актәи адаҟьаҟны иарбоуп Аџьынџьтәылатә еибашьра Дуӡӡа аветеранцәа 15-ҩык ирызкны аинформациа, урҭ, насыԥны иахьагьы рыԥсы ҭоуп. Агазеҭ «Аԥсны» аредактор хада Ахра Анқәаб ишазгәаиҭаз ала, агәра ганы дыҟоуп ари аныҳәа иазкны иҭыҵыз аномер, ҷыда аматериалқәа аԥхьаҩ игәаҟынӡа ишнеиуа. Агазеҭ кьыԥхьуп ԥшшәыла, зхаҭабзиара ҳараку ақьаад аҟны.