Алықьса Гогәуа иналукааша ашәҟәыҩҩы, ауаажәларратә усзуҩы ихьӡ Аԥсны анҭыҵгьы еицырдыруан. Ашәҟәыҩҩы есымша аԥсуа жәлар зыргәымҵуаз, ргәы иҵхоз ауаажәларра-политикатә проблемақәа рыӡбара дазхиан, ижәлар рыгәҭа дгылан, амилаҭ-хақәиҭратә қәԥара активла ихы алаирхәан.

Алықьса Гогәуа аԥсуа жәлар рмилаҭ-хақәиҭратә қәԥараҿы акыр зҵазкуа ароль назыгӡаз Аԥсны Жәлар Рфорум «Аидгылара» раԥхьатәи ахантәаҩыс дыҟан.

 1988-1991 шш. рзы Асовет Еидгыла жәлар рдепутатс дыҟан. Д. И. Гәлиа ихьӡ зху Аҳәынҭқарратә премиа ранашьаразы акомиссиа дахантәаҩын. Алықьса Гогәуа – авторс дрымоуп хыԥхьаӡара рацәала ажәабжьқәа, ароманқәа. Алықьса Гогәуа ироман-рапсодиа «Асду» акәзар, аԥсуа литератураҿы иналукааша аԥҵамҭахеит, Асовет Еидгыла иалаз ажәларқәа жәпакы рбызшәақәа рахь еиҭаргеит, иара убас европатәи абызшәақәеи аиапон бызшәеи рахь.