Аҽны аҳауатә шьақәгылазаашьа рацәак ишманшәаламызгьы, ари аиԥылара ауаа рацәа аднаԥхьалеит. Ахәмарра иазыԥҵәаз аамҭа хада иалагӡаны ашьапылампыласҩцәа даара рҽазыршәон амбақәа «рнапахьы» раагара, урҭ рааигәа, амбахьчаҩ иашҭаҿы изныкымкәа аҭагылазаашьа «уадаҩқәа» шаԥырҵозгьы аҩ-командак рыхәмарцәа, аӡәгьы ԥыжәарагара илшомызт, досу ржәыларақәа ԥибырҟәҟәаауан ҟазара ҳаракыла.
Гәыхыҭхыҭрала аиааира иазыԥшыз «Нарҭи», «Ерцахәи» рызгәыблҩцәа ргәыӷрақәа лыҵшәадахеит ԥшьынҩажәи жәаба минуҭ рыҩнуҵаҟа. Аха, ари аспорт хкы аԥҟарақәа инарықәныҟәаны, аԥсеиҭакра ашьҭахь ашьапылампыласцәа ирзацҵан аамҭаԥҵәа. Уаҟа еиҳагьы рҽазҵәылхны амбақәа «раԥшәымахара иазышәарыцо» иалагеит, иагьлыҵшәадамхеит уи иаарласны. Ахәмарра ажәабатәи аминуҭ азы «Нарҭ»-аа ржәылаҩ Алан Кәыҵниа илиршоит икоманда ԥыжәара аргара, аха аиԥылара аанкылара минуҭк шагыз «Ерцахә»-аа аҽеиҟаратәразы еиҵамхеит, 1:1 ҳәа еиҭахарала ихыркәшахеит изыцҵаз аамҭаԥҵәагьы. Анаҩс, иазыӡбан, иаиааиуа деилкаахарц, ахараԥсатә шҭаҟнытә ԥшьынтә-ԥшьынтә ампыл иасырц ахәмарцәа. Араҟа еиҳа рнаршә хиеит Аҟәатәи «Нарҭ» ашьапылампыласҩцәа, рыԥшьынтәгьы амба иҭашәартә инагӡан ампыл расра. Рымбахьчаҩ иакәзар «Ерцахә»-аа зысыз ԥшь-мпылк рахьтә акы ааникылеит, уи алагьы 5:4 ҳәа Аԥсны Ахраҿа хада аиҭархынҳәра рылдыршеит, инеизакны жәа-нтә уи агара зҽаԥсазтәхьоу Аҟәатәи «Нарҭ» ашьапылампыласҩцәа.
Аԥсны Ахраҿа хада агаразы раԥхьаӡа акәны ахәмаррақәа мҩаԥган 1996 ш. рзы, усҟан уи иаԥсахеит уажәы «Нарҭаа» изаԥыргаз «Ерацахә»-аа. Аиԥылараҿы «Иреиӷьу ахәмарҩы» ҳәа далкаан, иҷыдоу аҳамҭагьы ианашьан «Нарҭ» ашьапылампыласҩы Адгәыр Кәарацхьелиа.
2025 шықәсазтәи Аԥсны ашьапылампылтә сезон аартреи, атәыла Ахраҿа хада аҽаԥсатәреи ирызкыз, азҿлымҳара ҳаракы зҵаз аиԥылара иалахәын Аԥсны жәлар Реизара – Апарламент аспикер Лаша Ашәба, аҿари аспорти русқәа рзы Аҳәынҭеилакы ахантәаҩы и. н. Ҭарашь Ҳагба, Аԥсны ашьапылампыл Афедерациа Ахада Шабаҭ Логәуа уҳәа аҳәынҭқарратәи ауаажәларратәи усзуҩцәа реиԥш хыԥхьаӡара рацәала ашьапылампыл абзиабаҩцәа.