Аиԥылара алахәылацәа рзы MIT иҟанаҵаз ааԥхьараҿы, ахәҭакахьала, иазгәаҭоуп:
«… Аԥсны – Аладатәи Кавказ, Амшын еиқәа аҿықәан ишьҭоуп, рацәак ирзымдыруа тәылоуп, уи аԥсабареи аҳауеи зыҿурԥшша Франциа амрашәахәа зхьыршоу аҿықә ауп. Амшын инаваҵаны 200 киллометр ыҟоуп, иамоуп амшынҭаларҭақәа, акурортқәа, 4 - нызқь метра иҳараку Кавказ ашьхақәа. Урҭ зегьы атуристцәа рыдрыԥхьалоит. Атуризм анаҩсангьы, Аԥсны ақыҭанхамҩа аԥыжәара амоуп…
Шәара Аԥсны, уи аекономикатә мчхара, аинвестициатә лшарақәа рбаразы алшара шәыҭахоит, иара убас ргьама жәбар алшоит аԥсуа ҩқәа, ажьаӷь уатка».
Аиԥылара аартуа, Шмидт иазгәеиҭеит адәныҟатәи аполитика убри инадҳәаланы анемец нападкылаҩцәа рекономикатә лшарақәа ҳазну аамҭазы улаԥш рхьымӡо рҽеиҭаркуеит, иаадыртуеит амҩа ҿыцқәа.
«Аԥсны иҵегьы хшыҩзышьҭра азухароуп Германиа, иара убас акырӡа аҵанакуеит аҭагылазаашьа аилкааразы аԥсуа ган иҵегьы аҿцаара», – иҳәеит иара. Ашьҭахь Ахәаахәҭра-­ааглыхратә палата ахаҭарнак Аԥсны ӡыригеит, дрылацәажәеит уи иамоу аинвестициатә лшарақәа.
В.Матцке иара убас «Аԥсны аҩқәеи аӡқәеи», «Дәрыԥшьтәи аҩыҟаҵарҭа», «Шаҭо Аԥсуа» раалыҵқәа, аԥсуа џьыка, иара убас хаҭалатәи анападкылаҩ Гәында Ҳаразиа лнапкымҭақәа дрыхцәажәеит. Асасцәа ирбеит Ахәаахәҭра-ааглыхратә палата иархиаз ашәҟәқәа, акаталогқәа, иахәаԥшит Аԥсны иазку афильм.
«Ари аусмҩаԥгатә ахь инеиз аӡәырҩы ирҳәеит Аԥсны иаҭаарц, уи акультуреи атрадициақәеи, атуристтә, аекономикатә лшарақәеи еилыркаарц шырҭаху», – иҳәеит Вольфганг Матцке аӡыргара еихшьалауа.
Абасеиԥш иҟоу аусмҩаԥгатәқәа Ахәаахәҭра-ааглыхратә палата ахаҭарнак иалахәра аимадарақәа рырҭбаара иацхраауеит. Германиа абизнес-хеидкылақәа рхаҭарнакцәа еилыркаауа рацәахоит, абригьы аусеицуразы алшара ҿыцқәа аанартуеит.