Ааԥынтәи ашкол ԥсшьарамшқәа раан урҭ гәарҭоит Аԥсны араионқәа зегьы рҟны иҟоу ахәыҷбаҳчақәа рҿы, – иаанацҳауеит агәабзиарахьчара Аминистрра апресс-маҵзура.
Агәабзиарахьчара аминистр инапынҵақәа назыгӡауа Едуард Быҭәба дырҭааит Аҟәа иҟоу ахәыҷ баҳчақәа «Алашара», «Улыбка». Абаҳчақәа реиҳабацәа агәабзиарахьчара Аминистрра ахадеи Урыстәылатәи аҳақьымцәеи иҭабуп ҳәа рарҳәеит ахәыҷқәа ргәабзиара ахьеилыркаауа азы.
Быҭәба иазгәеиҭеит амедицинатә хәаԥшрақәа рыҩаӡара шыҳараку.
«Ахәыҷ баҳчақәа ҩба ҳарҭааит. Аҳақьымцәа ахәыҷқәа ирыхәаԥшуеит, аҭҵаарақәа мҩаԥыргоит. Абри азы ҭабуп ҳәа расҳәоит аҵара Аминистрреи ахәыҷ баҳчақәа реиҳабацәеи. Рыцҳарас иҟалаз, аҭаацәа рганахьала ари мап ацәызкуа ыҟоуп, убри ахырхарҭалагьы аус аауеит», – иазгәеиҭеит Быҭәба.