Апроект Аԥснынтәи иалахәын 11-ҩык астудентцәа.

Иара мҩаԥысуан "Аиааира 9/45" ҳәа изышьҭоу жәларбжьаратәи аиҿкаара аҳәаақәа ирҭагӡаны. Ари аусмҩаԥгатә алахәхара алыршахеит Евразиа Акинематографист ҿарацәа рассоциациа (МАКЕ) Аҟәа имҩаԥнагаз аилатәара ашьҭахь.

Ари афорум еиднакылеит Аԥсны, Ермантәыла, Белоруссиа, Ҟазахсҭан, Кыргызсҭан, Молдавиа, Таџьикистан, Узбекистан рҟынтәи 150-ҩык инареиҳаны алахәылацәа.

Аусмҩаԥгатә аҟны ирзаԥхьеит алекциақәа, иддырбеит авидео аус  адулашьа, аҭыхшьа, асценари аиқәыршәашьа, ыуҳәа. Анаҩс имҩаԥыргон атематика иашьашәалоу еиуеиԥшым ахәмаррақәа.

«Сара ари афорум схы аласырхәит, избанзар, арежиссиорра схы адысҳәалар сҭахуп, исҭахуп афильмқәа рҭыхра аԥсуа тематика иадҳәаланы. Избеит ари афорум шеиҿыркаауаз хәымш иалагӡаны, уи Москва имҩаԥысуан. Хәымш рыҩнуҵҟа иаҳбаз иҳаҳаз даараӡа ирацәахеит. Убасгьы уаҟа иҳаман апрактикатә усқәа, иаҳдырбон афильмқәа шҭырхуаз, акәамаҵамарақәа иаҵоу. Иара убасгьы, схы аласырхәит афильмаҟны, раԥхьаӡакәны актиор хада иаҳасабала. Уи афильм зызкыз Аџьынџьтәылатә еибашьра Дуӡӡа 80 шықәс аахыҵра ауп... Цәгьала исгәаԥхеит, уажәшьҭа актиоррагьы арежиссиоррагьы схы адысҳәаларц сҭахуп», ҳәа азгәалҭеит афорум иалахәыз руаӡәк, ААУ афилологиатә факультет ажурналистика аҟәша 3-тәи акурс астудент Аида Габниаԥҳа.

МАКЕ ацхыраарала, ареспублика аҟынтәи акинорежиссерцәа, иааиуа Аџьынџьтәылатә еибашьра Дуӡӡа Аиааира амш азы адокументалтә фильм аиқәыршәара ргәы иҭоуп.

Саида Ҳаразиа