Ажәахәқәа рыла аизараҿы иқәгылеит ахеидкыла аиҿкааҩцәа ируаӡәку Нодар Ҷанба, Нугзар Логәуа, иара убас Аҧсны аҭҵаарадыррақәа Ракадемиа апрезидент Зураб Џьапуа, Астратегиатә ҭҵаарақәа рцентр аиҳабы Виачеслав Чрыгба.

Аҧсны аинтеллигенциа рхеидкыла аиҿкааратә еилатәара иаднакылеит ақәҵара. Аизара ду ирыланаҳәоит Аҧсны аҩныҵҟатәи адәныҟатәи аекономикатә, асоциалтә, агәабзиарахьчаратә, абзазаратә, аҵарадырратә, акультуратә, абызшәатә, адемографиатә, арепатриациатә зҵаарақәа рыла аҳәынҭқарраҿ имҩаҧысуа аполитикатә знеишьақәа гәцаракрыла аҽрылахәра ишазхиоу.

Аидгыла аҿаҧхьа иқәнаргыло азҵаара хадақәа ируакуп: аҳәынҭқарра адәныҟатәи, аҩныҵҟатәи аполитикатә шьақәгылараҿы ацхыраара аҟаҵара; аидгылара иара убас гәцаракра азнауеит аҵарадырра асистема ареформақәа ралагалара; зҿлымҳара азнауеит аҵарадырра азакәан аус адулара, иацхраауеит ахатәы бызшәа арҿиара апроцесс.

Аидгыла азықәҧалоит аҧсуа жәлар ртрадициақәа, рҵас, рқьабз реиқәырхара, акультуратә хәышҭаарақәа рҭагылазаашьа аиӷьтәра, рыцхраара; ақыҭатә школқәа, акультуратә ҩнқәа, аклубқәа рыгәцаракра, иацхраауеит ашкол арҵаҩы истатус, иааидкыланы арҵаҩыааӡаҩ иаҳаҭыр ашьҭыхра; аинформациа-амассатә хархәагақәа ахылаҧшра рыҭара, рыцхраара; абжьаратә, еиҳау аҵараиурҭақәа рхылаҧшра, рывагылара; ажәлар ргәабзиара аҭагылазаашьа азҿлымҳара; акадр азыҟаҵара аполитика ахылаҧшра, адемографиа; арепатриациатә политика азҿлымҳара, аспорт ахырхарҭа ала аҿар рааӡара, аҿар рполитика ахылаҧшра»; абыргцәа Рхеилак ауаажәларраҿы астатус ашьҭыхра; ахырхарҭақәеи азанааҭқәеи рыла ауаажәларра-експерттә комиссиақәа раҧҵара уҳәа убас.